Өскемен тұрғыны, әскери авиация ардагері Николай Петинцев референдум учаскесіне парапланмен ұшып келіп, өз таңдауын жасады, деп хабарлайды F16.kz.
Аспанда ұшып жүргенде қандай жауапкершілік сезілсе, елдің ертеңі үшін дауыс беру де дәл сондай маңызды, дейді тәжірибелі ұшқыш. Сол себепті ол өзіне тиесілі учаскенің маңындағы ашық алаңға парапланмен келіп қонып, бірден дауыс беруге бет алды.
Николай Петинцевтің өмірі авиациямен тығыз байланысты. Бала күнінен көкке ұмтылып, ұшқыш болуды армандаған ол зейнетке шыққанға дейін әскери ұшақтың тізгінін ұстады. Ол парапланмен әуеде еркін қалықтап ғана қоймай парашютпен секіруді де шебер меңгерген.
Өмір бойы мемлекетке қызмет еттім. Қазір 63 жаста болсам да, елдегі маңызды саяси науқандардан тыс қалған емеспін. Бүгінгі таңдау – тек менің емес, бүкіл Қазақстанның болашағына қатысты, – деді Николай Петинцев.
Оның аспанға сүйіспеншілігі бала кезінен басталған. Тіпті бес жасында-ақ болашақта ұшқыш болатынына кәміл сенген. Катонқарағай ауданының Белқарағай ауылында дүниеге келген Николай 16 жасынан бастап парашют спортымен айналысады. 1978 жылы авиациялық-спорт клубында алғаш рет парашютпен секіріп, үлкен авиацияға алғашқы қадамын жасайды. Кейін ол Барнаулдағы әскери ұшқыштар училищесіне оқуға түсіп, кәсіби ұшқыш атанады. Оқу орнын тәмамдаған соң «СУ-24» әскери ұшағымен ұшып, Ауғанстандағы жауынгерлік тапсырмаларды орындауға қатысқан.
Жылдар өте келе Николай жаңа әуестік – параплан спортына бет бұрды. Оның айтуынша, соңғы он жылда жерден гөрі аспанда өткізген уақыты әлдеқайда көп. Бүгінгі референдум күні де ол өзгеше тәсілмен келіп, өз таңдауын жасап, ел болашағына бейжай қарамайтынын көрсетті.
