Өскемендегі «АДК» сауда-ойын-сауық орталығында Наурызнама онкүндігі аясында Байжігіт атындағы қазақ халық аспаптар оркестрінің мерекелік концерті өтті, деп хабарлайды F16.kz.
Ұлыстың ұлы күні қарсаңында ұйымдастырылған бұл музыкалық кеш қала тұрғындары мен қонақтарына ерекше рухани әсер сыйлап, ұлттық өнердің көркем үлгісін паш етті.
Шара барысында оркестр қазақтың классикалық туындылары мен халық күйлерін жоғары деңгейде орындап, көрермендердің ыстық ықыласына бөленді. Домбыра мен қобыздың қоңыр үні, оркестрдің үйлесімді әуені сауда орталығын ерекше атмосфераға бөлеп, жиналған жұртты ұлттық музыка әлеміне жетеледі.
Мерекелік концерт Наурыз мейрамының мән-маңызын тереңдете түсіп, көктемнің шуақты көңіл күйін сезіндірді. Осындай мәдени шаралар арқылы ұлттық құндылықтар дәріптеліп, халықтың рухани байланысы нығая түсетіні анық.
