1 наурыз — Алғыс айту күніне орай өңірде дәстүрлі «Жүректен жүрекке» қайырымдылық акциясы басталады. Үш ай бойы жалғасатын бұл жоба балалардың арманын орындауды көздейді. Бұл туралы облыстық білім басқармасының баспасөз қызметі мәлім етті, деп хабарлайды F16.kz.
Бұл акцияның аймақта өткізіліп келе жатқанына биыл 10 жыл толды. Осы уақыт ішінде демеушілер мен қайырымды жандардың арқасында 24 822 баланың тілегі орындалды. Биылғы мақсат — бұл көрсеткішті одан әрі арттырып, мейірімділік шеңберін кеңейту.
Жоғарыда атап өткендей, қайырымдылық шарасы биылғы 31 мамырға дейін жалғасады. Акция аясында аз қамтылған отбасы балаларының мұқтаждықтары қарастырылады. Мәселен, киім-кешек және аяқ киім, кітаптар мен зияткерлік ойындар, спорт жабдықтары мен шығармашылыққа арналған бұйымдар деген сияқты.
Игі бастамаға қатысуға ниет білдірген кез келген тұрғын, коммерциялық ұйым немесе жеке кәсіпкер балалардың тілегін орындауға атсалыса алады. «Жүректен жүрекке» жобасы — жай ғана көмек емес, бұл қоғамның бірлігі мен балалардың жарқын болашағына салынған инвестиция.
Әрбір орындалған тілек — баланың күлкісі мен ертеңге деген сенімі. Біздің ортақ күшіміз мұқтаж жандардың өмірін өзгерте алады, — деді ұйымдастырушылар.
