Шығыс Қазақстанда көктемгі абаттандыру және санитарлық тазалық жұмысы қыза түсті. Осыған орай аймақ басшысы сенбілікке адамдарды мәжбүрлеп қатыстыруға болмайтынын ескертті, деп хабарлайды F16.kz.
Ауа райының жылынуына және санитарлық тазарту мен аумақтарды абаттандыру жұмыстарының жүргізілуіне байланысты экологиялық акциялар мен сенбіліктер ұйымдастырудың бірыңғай ұстанымын түсіндіру қажет деп санаймын.
Ең алдымен, мұндай іс-шараларға қатысу тек ерікті түрде жүзеге асырылатынын атап өтемін.
Сонымен қатар негізгі назар тұрғындардың өз үйлері мен аулаларына іргелес аумақтарды тазалауға бағытталуға тиіс, бұл – әрбір шығысқазақстандықтың азаматтық жауапкершілігі.
Кәсіпорындар мен ұйымдардың қызметкерлері қала көшелері мен қоғамдық орындарды тазалауға тек өз еркімен қатысуы қажет. Мұндай жұмыстарға мәжбүрлеудің кез келген түріне жол берілмейді. Әрбір азаматтың демалуға және жеке уақытына толық құқығы бар, бұл құқық мүлтіксіз сақталуға тиіс.
Сенбілік – өз өңірінің тазалығы мен дамуына бейжай қарамайтын азаматтардың белсенді ұстанымының көрінісі.
Біздің ортақ мақсат «Таза Қазақстан» бастамасының міндеттері мен қағидаттарына негізделеді. Себебі бұл – бір реттік науқан емес, ұзақ мерзімді стратегиялық бағыт.
Барлық азаматтардың құқықтары мен бостандықтарын құрметтей отырып бірлескен күш-жігер арқылы ғана біз абаттандыру, санитарлық жағдайды жақсарту және экологиялық мәдениетті қалыптастыруда елеулі нәтижелерге қол жеткізе аламыз.
Барша тұрғындарды осы игі іске жеке атсалысуға шақырамын, – деді Нұрымбет Сақтағанов әлеуметтік желідегі парақшасында.
