Қазақстан Президенті Қасым-Жомарт Тоқаев АҚШ басшысы Дональд Трампты Артемида-2 миссиясының табысты орындалуымен құттықтады, деп хабарлайды F16.kz порталы Ақордаға сілтеме жасап.
Мемлекет басшысы миссияның сәтті аяқталуына орай Америка Президентіне арнайы құттықтау жеделхатын жолдады. Жолдауда Қасым-Жомарт Тоқаев адамзаттың кейінгі жарты ғасырдағы Айға жасаған алғашқы сапары ғарышты игерудегі тарихи кезеңге айналғанын атап өтті. Оның айтуынша, бұл жетістік бүкіл әлем үшін маңызды оқиға болып саналады.
Президент сондай-ақ АҚШ-тың ғылым мен технология саласындағы озық табыстарына жоғары баға берді. Ол мұндай ірі жобалар жаһандық ғылыми қауымдастыққа тың серпін беріп, ғалымдар, инженерлер мен зерттеушілердің жаңа буынын жігерлендіретінін жеткізді. Сонымен қатар бұл жетістіктер жас ұрпақтың ғылымға деген қызығушылығын арттырып, білім мен инновация көкжиегін кеңейтетініне назар аударды.
Қасым-Жомарт Тоқаев өз жеделхатында Дональд Трампқа Артемида бағдарламасы аясындағы бастамаларды және ғарыш саласындағы өзге де жобаларды жүзеге асыруда табыс тіледі.
