Шығыс Қазақстан облысында республикалық маңызы бар автожолдарды жаңарту жұмыстары жалғасуда. Өңірге жұмыс сапары барысында облыс әкімі Нұрымбет Сақтағанов жөндеу жұмыстарының барысымен танысып, мердігер ұйымдардың жұмысын тексерді, деп хабарлайды F16.kz сайты.
Қазіргі уақытта Риддер – Өскемен автожолында күрделі жөндеу жүргізілуде. Жаңғыртылатын учаскенің жалпы ұзындығы – 75 шақырым. Бүгінгі күнге дейін оның 64 шақырымында жұмыстар толық аяқталған. Жолды толықтай асфальттау күз мезгілі басталғанға дейін аяқталады деп жоспарланып отыр.
Сонымен қатар облыс әкімі республикалық маңызы бар Өскемен – Шемонаиха автожолындағы орташа жөндеу жұмыстарының барысын да тексерді. Бұл бағытта ұзындығы 27 шақырым болатын жол учаскесі жаңартылып жатыр. Нысанда 60 арнайы техника жұмыс істеуде. Қазіргі таңда жолдың 14 шақырымында жөндеу жұмыстары аяқталған.
Жұмыс сапары барысында Нұрымбет Сақтағанов жол құрылысының сапасы мен белгіленген мерзімде аяқталуына ерекше назар аударды.
– Жолдарды жаңарту – біздің басым бағыттарымыздың бірі. Сапалы әрі қауіпсіз жолдар тұрғындардың өмір сүру жайлылығына, елді мекендердің көлік қолжетімділігіне және облыс экономикасының дамуына тікелей әсер етеді, – деді облыс әкімі.
Өңірде жол инфрақұрылымын жаңарту жұмыстары кезең-кезеңімен жалғасады. Бұл жобалар көлік қатынасының қауіпсіздігін арттырып, тұрғындар мен жүк тасымалы үшін қолайлы жағдай жасауға мүмкіндік береді.
