Елімізде миллиардтаған теңге көлемінде қаражат бөлінсе де, бірде-бір медаль алынбаған спорт түрлері бар. Жоғарғы аудиторлық палата спортшыларды даярлауға бөлінген қаржыға мемлекеттік аудит жүргізіп, бірқатар заңбұзушылықты анықтады, деп хабарлайды F16.kz.
– Аудит 6 жаздық олимпиадалық спорт түрі бойынша кешенді мақсатты бағдарламалар бекітілмегенін көрсетті. Сонымен қатар, 46 жазғы олимпиадалық спорт түрінің 19-ы бойынша спорт ұйымдарында спортшыларды даярлау бағдарламалары жоқ. Оның ішінде 5 спорт түрі бойынша нашар дайындық пен бәсекелестіктің төмендігіне байланысты спортшылар Олимпиадаға іріктелу құқығын бермейтін басқа халықаралық жарыстарда ғана өнер көрсетіп, олимпиадалық іріктеу турнирлеріне қатыспаған. Бұл ретте 2022-2024 жылдар аралығында оларды дайындауға және шығындарын өтеуге бюджеттен шамамен 2 миллиард теңге жұмсалыпты. Бүгінде олимпиадалық спорт түрлерінен жаттықтырушылар жетіспеушілігі байқалады. Есесіне, олимпиадалық емес спорт түрлерінің штаттары тым үлкен. Өйткені ол спорт түрлерінде медальдар мен бонустар беріледі, – дейді аудиторлар.
Белгілі болғандай, медальдар санының өсуіне қарамастан, спорт шығындарының тиімділігі төмендеген. 2022-2024 жылдар аралығында спорттың 11 түріне 4 миллиард теңгеге жуық қаражат жұмсалған. Соған қарамастан, аталмыш спорт түрлерінен бірде-бір медаль қоржынға түспеген.
Сондай-ақ, Жоғарғы аудиторлық палата Резервтерді дайындау жүйесінің тиімділігі төмен екенін жеткізді. Атап айтсақ, балалар мен жасөспірімдер спорт мектебінде ашық іріктеу жоқ, спортшылар мен жаттықтырушылардың бірыңғай цифрлық есебі жүргізілмейді, ал медициналық сүйемелдеу ескірген және барлығын қамтымайды.
Бұдан басқа 2021-2024 жылдар аралығында «Спортты дамыту дирекциясының» әкімшілік персоналына 3,5 миллиард теңгеден астам қаражат бөлінгені белгілі болды. Кейбір жағдайларда төлемдер сомасы жалақы қорынан асып түскен, ал бір адамға шаққандағы орташа сыйақы жылына 7,7 миллион теңгеге жеткен. Бұл ретте оқу-жаттығу процесінің сапасы үшін қосымша ақылар спортшыларды даярлауға қатысы жоқ қызметкерлерге де беріліпті. Аудит қорытындысы бойынша барлығы 17 миллиард теңгенің заңбұзушылығы анықталған. Оның 348 миллион теңгесі – қаржылық, 2,8 миллиард теңгесі – тиімсіз жоспарлау және 13,7 миллиард теңгесі тиімсіз пайдалануға қатысты заңбұзушылықтар болды.
Аудит қорытындысы бойынша 157 іс құзырлы органдарға жолданды.
