Абай облысының әкімдігі Қала күніне орай семейліктерге жаңа саябақ тарту етпек. Қазір Қарағайлы ықшам ауданындағы «Абай арена» спорт кешенінің дәл жанынан ірге көтеретін нысанның құрылысы қарқынды жүріп жатыр, деп хабарлайды F16.kz.
Облыс әкімдігінің ақпаратына сүйенсек, қазір ол жерде абаттандыру, көгалдандыру, жаяу жүргіншілер жолын төсеу және жарық бағаналарын орнату жұмыстары жүргізіліп жатыр. Жасыл аймақ жасау үшін 2 000 қарағай көшеті жеткізіліп, оның 500-і егілген. Жоспар бойынша саябақта сібір шыршасы, қарағай, ұсақ жапырақты жөке, қарағаш, қотыр қайың сияқты ағаштардың көшеті мен мажар жұпаргүлі, раушангүл, тобылғыгүл, кәдімгі жұпаргүл, көрікті әскергүл, түймедақ, арша, фассен көкжалбызы, шайшөп сынды гүлдер отырғызылады.
Бүгінгі дейін жұмыстың жартысына жуығы орындалған, саябақты толық аяқтау Қала күніне, яғни қыркүйектің үшінші жексенбісіне жоспарланып отыр.
Аумағы 5 гектар болатын жаңа саябақта серуендеу аллеясы, сахна, мәдени-көпшілік іс-шараларға арналған алаңдар, демалыс орындары және сауда павильондары болады, — делінген хабарламада.
Жаңа саябақ жақын маңдағы қала тұрғындары үшін қолайлы демалыс орнына айналмақ.
