Өскемендегі Медициналық университет филиалының резиденттерімен өткен кездесуде Коалиция мүшелері жаңа Конституция жобасындағы негізгі өзгерістерді түсіндірді. Әсіресе ғылыми қауымдастықты қолдау және ғылыми кадрларды жаңғырту мәселесіне ерекше назар аударылды.
Кездесу барысында Конституция жобасында ұлттық дамудың басты ресурсы ретінде ғылым мен адами капиталды дамытуға басымдық берілетіні айтылды. Бұл – елдің болашағы табиғи байлықпен емес, білімді, білікті әрі жаңашыл азаматтардың әлеуетімен айқындалатынын білдіретін маңызды стратегиялық ұстаным.
Коалиция мүшесі Сергей Попов жаңа құжатта ғылым мен адами капиталдың стратегиялық ресурс ретінде танылуы ұзақ мерзімді дамуға берік негіз болатынын атап өтті. Оның айтуынша, бұл әсіресе медицина саласында білім алып жүрген резиденттер үшін маңызды. Себебі заманауи медицина тәжірибемен қатар ғылым мен зерттеуге сүйенеді.
Сондай-ақ мемлекет ғылыми кадрларды қолдауды күшейту арқылы технологиялық және зияткерлік серпіліске жол ашатыны айтылды. Бұл жастардың ғылымға келуіне және ел ішінде кәсіби тұрғыда өсуіне нақты мүмкіндік береді.
Қазірдің өзінде қабылданып жатқан кешенді шаралар нәтижесін көрсетіп отыр. Бүгінде ғылым саласындағы жастардың үлесі 46 пайызға жеткен. Бұл ғылыми кадрлардың жаңарып, саланың «қартаю» қаупі азайып келе жатқанын аңғартады.
Кездесу соңында резиденттер өз сұрақтарын қойып, ғылыми даму мен кәсіби өсу мүмкіндіктері туралы пікір алмасты. Жаңа Конституция жобасында ғылым мен білімнің әлеуметтік-экономикалық тұрғыда нақты қолдау табуы Қазақстанда тұрақты ғылыми орта мен кәсіби қауымдастықтың қалыптасуына негіз болатыны атап өтілді.
