Қазақстанда салынатын бірінші атом электр стансасына білікті кадрлар даярлау қарқынды жүргізіліп жатыр. Бұл туралы Атом энергиясы жөніндегі агенттік мәлім етті, деп хабарлайды F16.kz.
Консорциум көшбасшының міндетіне қызмет көрсетуші персоналдарды даярлау кіреді. АЭС пайдалану үшін шамамен 2 000 адам, оның ішінде ядролық мамандық бойынша 400 адам қажет. Ал қалғандары — бізде жұмыс істеп тұрған көмір және газ электр стансаларында еңбек ететін бейінді-техникалық мамандар. Ядролық мамандықтар бойынша қызметкерлерді даярлауға келсек, қазіргі уақытта физикамен, энергетика және электртехникасымен байланысты 18 білім бағдарламасы бойынша білікті кадрларды даярлау қарқынды жүргізіліп жатыр, — деді агенттіктен.
Агенттік таратқан мәліметке сүйенсек, өскемендік Д.Серікбаев атындағы Шығыс Қазақстан техникалық университетінде, Л.Гумилев атындағы Еуразия ұлттық университетінде, Әл-Фараби атындағы Қазақ ұлттық университетінде, сонымен қатар ядролық технологияға маманданған шетелдік жетекші ЖОО-ларда мамандар даярлау қолға алынған. Ядролық мамандықтар бойынша білім гранттар санын арттыру қажеттілікке қарай жүзеге асырылады. Сонымен қатар білім алып жатқан жас мамандар жұмыс істеп тұрған АЭС-терде тәжірибе жинақтап, тағлымдамадан өтеді.
