Еліміздегі тұңғыш атом электр стансасының «бірінші бетоны» шамамен 2029 жылы құйылады. Бұл туралы Атом энергетикасы жөніндегі агенттік төрағасы Алмасадам Сәтқалиев айтты, деп хабарлайды F16.kz Kazinform агенттігіне сілтеме жасап.
Естеріңізге салайық, АЭС-тің құрылысын ресейлік «Росатом» компаниясы жүрізеді,
«Росатом» жұмысты өте сәтті бастады. Жұмыс кестеге сәйкес жүріп жатыр. Шамамен 50 ұңғыма бұрғыланды. Топырақ алынып, сарапталып жатыр. Шамамен 2 мың нүктеден радионуклид анықтауға сараптама жүргізілді. Гидрологиялық, гидротехникалық, инженерлік сараптама, жергілікті жерге топографиялық сараптама жүргіздік. Екі гидробекет орнатылды. Жалпы, жұмыс кестеге сай жүргізіліп жатыр. Бұған дейін айтқанымыздай, 18 айдың ішінде жобалау-іздестіру жұмысы аяқталып, стансаның түпкілікті пішіндемесін аламыз, — деді агенттік төрағасы.
Қазіргі таңда кадрларды дайындау басталып кеткен. Еліміздің 7 жоғары оқу орнында мамандандырылған бөлімшелер ашылды.
Халықаралық ұйымдармен, оның ішінде Мажарстан, Франция, Жапония, Қытай және Ресейдің кадрлар дайындау орталықтарымен Қазақстан мамандарын дайындау туралы келістік. Мұнан бөлек, қазірдің өзінде Қытай шамамен 200 грант бөлді. Қазір атом энергетикасы стансасында жұмыс істеу бойынша бейінді мамандық алуға ниетті жас мамандардан өтінім жинаймыз, — деді Алмасадам Сәтқалиев.
Жас мамандар Франция, Қытай, Ресей, Мажарстан елдерінің энергетикалық нысандарында тәжірибеден өтпек.
