Биылғы 15 қыркүйектен бастап Қазақстанда eGov, eGov Business, Aitu және eOtinish сервистері интернетсіз жұмыс істейтін болады. Премьер—министр Олжас Бектенов төрағалық ететін Цифрлық штаб осындай шешім қабылдады, деп хабарлайды F16.kz.
Бұл қадам ХҚКО-ларға (ЦОН) түсетін жүктемені азайтып, мемлекеттік қызметтерді онлайн көрсетуге негізделген digital by default форматына көшу үдерісін жеделдетуге тиіс.
Үкіметтің мәліметінше, елімізде барлығы 1 408 мемлекеттік қызметтің 368-і толық автоматтандырылған, тағы 984 қызметті одан әрі цифрландыруға мүмкіндік бар. Жыл соңына дейін олардың бір бөлігін жасанды интеллект қолдану арқылы проактивті форматқа көшіру жоспарланып отыр.
Сонымен қатар 20 қыркүйекке дейін Smart Bridge платформасы арқылы жеке IT шешімдерді мемлекеттік сервистермен интеграциялау мүмкіндігін ашу жоспарланып отыр. Бүгінгі таңда бұл платформа арқылы 14 мыңнан астам өтінім қабылданған.
Үкімет сондай-ақ Qaztech платформасында ірі цифрлық жобаларды іске қосуды жеңілдету үшін IT өнімдерді әзірлеу құны мен мерзіміне қойылған шектеулерді алып тастамақ. Бұған дейін бір өнімнің құны 15 мың АЕК-тен (шамамен 59 млн теңге) аспауға тиіс болатын, ал әзірлеу мерзімі алты аймен шектелген еді.
Айта кетейік, 2025 жылдың алғашқы жартыжылдығында қазақстандықтар eGov.kz порталы мен eGov Mobile мобильді қосымшасының қызметтерін 26 миллионнан астам рет пайдаланған.
