Халықаралық әйелдер күні қарсаңында Шығыс Қазақстан облыстық этнографиялық музейінде «Әйелге деген сүйіспеншілікпен» атты ерекше көрме ашылды, деп хабарлайды F16.kz.
Көрмеге музей қорынан алынған XIX ғасырдың соңы мен XX ғасырдың басында жасалған 300-ден астам фарфор бұйымдары қойылған. Экспозициядан фарфор сервиздер, авторлық мүсіншелер, сирек кездесетін коллекциялық бұйымдар мен әйелдердің тұрмыста пайдаланған заттары ұсынылған.
Келушілер сол заманның атмосферасын сезініп, мәдениетімен жақынырақ танысу үшін музей қорындағы ең құнды фарфор бұйымдарды қойдық. Олардың қатарында Кузнецов, Гарднер зауыттарының, Ломоносов атындағы Императорлық фарфор зауытының, Ленинград фарфор зауытының және өзге де шетелдік шеберлердің туындылары бар. Әсіресе неміс шебері Оскар Флигельмейхтің мүсіншелері ерекше орын алады, — деді музей қорлары бөлімінің маманы Елена Лабецкая.
Сонымен қатар көрмеден XIX ғасырдың соңында жасалған ағылшын асханалық сервизі, желпуіштер, театр қолғаптары, сөмкелер, әшекейлер және сол кезеңдегі әйелдер қолданған түрлі әшекейлерді де тамашалауға болады.
Ұйымдастырушылардың айтуынша, көрме сол дәуірдегі әйелдердің өмірін, сәні мен талғамын көрсетіп, келушілерге тарихи атмосфераны сезінуге мүмкіндік береді.
«Әйелге деген сүйіспеншілікпен» көрмесі екі ай бойы жұмыс істейді.
