Белгілі айтыскер ақын Серік Қуанған елімізде өтіп жатқан «Мен оқыған 10 кітап» республикалық акциясына қатысып, өзі оқыған қызықты кітаптар туралы айтты.
Аталған акция биыл 23 сәуір – Ұлттық кітап күні аясында басталған. Ондағы негізгі мақсат – қоғамда, әсіресе жастар арасында кітап оқу мәдениетін қалыптастыру және әдебиетке деген қызығушылықты арттыру.
Акция аясында ақын өзінің дүниетанымына әсер етіп, рухани дамуына ықпал еткен бірқатар классикалық және заманауи шығарманы ұсынды. Ақтаңгер ақын Серік Қуанған оқыған кітаптар:
«Абай жолы» – рухани азық берген шығарма;
«Аласапыран» – тарихи танымды тереңдететін туынды;
«Сират» – танымдық мазмұнға бай еңбек;
«Періштелер өлімі» – қайсар рухты бейнелейтін шығарма;
«Атау кере» – психологиялық тереңдігімен ерекшеленген туынды;
«Біздің ауылдың амазонкалары» – ауыл өмірін шынайы суреттейтін кітап.
Акция талаптарына сәйкес, қатысушылар тек кітаптар тізімін ұсынып қоймай, әр шығарманың өз өміріне, ой-өрісіне тигізген әсері жайында да пікір білдіреді.
Айта кетейік, Серік Қуанған – Шығыс Қазақстан өңірінің тумасы, республикалық деңгейдегі айтыстарда бірнеше мәрте жүлдегер атанған танымал ақын.
