Шығыс Қазақстан облысының әкімі Нұрымбет Сақтағанов Өскемен көшелерін аралап, қар күреу жұмысы қалай атқарылып жатқанын, қоғамдық көліктердің қалай жүретінін тексерді, деп хабарлайды F16.kz.
Бұл мәселелерге байланысты кейінгі кезде тұрғындар жиі шағымдана бастаған. Халықтың мұң-мұқтажын ескерген аймақ басшысы жағдайды көзбен көру үшін қаланы аралады.
Қыс мезгілінде мұндай мәселелер адамдардың қауіпсіздігі мен жайлылығына тікелей әсер етеді. Ең алдымен адам көп жүретін көшелер, тротуарлар, аялдамалар, жаяу адам өткелдері мен аулалар қардан тазалануға тиіс. Ал менің үйім мен әкімдіктің алды ең соңғы кезекте тазалануы керек, — деді ШҚО әкімі.
Аймақ басшысы кәсіпкерлер мен ғимарат иелері өз аумағын қардан уақтылы әрі сапалы тазалап отыруы үшін қала әкіміне түсіндіру жұмысын күшейтуді тапсырды.
Коммуналдық техниканың жағдайын шынайы бағалап, қар жаумай тұрып алдын ала дайындалу қажет. Қар жауған кезде ғана әрекет етуге болмайды, — деді Нұрымбет Сақтағанов.
Облыс әкімі автобуспен жүріп, жолаушылармен сөйлесті. Тұрғындар жағдайдың жақсарып қалғанын айтты. Облыс әкімі қаланың барлық жеріне автобустардың уақтылы қатынауы мен көшелердің дер кезінде қардан тазалануы өскемендіктер үшін қолайлы орта қалыптастыруға тікелей әсер ететін негізгі көрсеткіштер екенін атап өтті.
