Катонқарағай ауданы Аққайнар ауылының халқы таза ауызсу мен жол мәселесін қозғаған. Тұрғындардың өтінішімен Amanat партиясы ШҚО филиалы партиялық бақылау комиссиясының мүшелері ауылға арнайы келіп, жағдайды көзбен көрді, деп хабарлайды F16.kz.
Партия мүшелерімен бірге жергілікті атқарушы органның өкілдері, аудандық мәслихат төрағасы және коммуналдық кәсіпорын басшылары болды. Олар жергілікті тұрғындармен сөйлесіп, мәселенің мән-жайын зерделеді.
Кездесуде ауылдық дәрігерлік амбулатория, мектеп ұжымы және ауыл адамдары көтерілген мәселелердің өзектілігін растады. Негізгі проблема — орталықтандырылған таза ауызсудың үздіксіз берілмеуі және Жаңа Үлгі ауылына дейінгі 3 шақырымнан асатын жол учаскесінің ұзақ жылдар бойы жөнделмеуі.
Біз бұл мәселелерді жылдар бойы көтеріп келдік, бірақ нақты қозғалыс болмаған. Ауызсу тапшылығы, әсіресе қыста өте қиын. Жол мәселесі де көп жылдан бері айтылып келеді. Партия өкілдері ауылға арнайы келіп, жағдайды көзбен көріп, нақты шешім ұсынғанына ризамыз. Жұмыс басталғанына қуаныштымыз. Ең бастысы – бұл іс аяқсыз қалмай, тұрғындар күткен нәтиже шығады деген үмітіміз бар, — деді Аққайнар ауылының тұрғыны Байғажи Жакияров.
Ауылдағы ауызсу мәселесін шешу үшін бүгінде аудандық мәслихат шешімімен қажетті қаражат бөлініп, Өскеменнен қосалқы құрал-жабдық сатып алынған. Енді қуаты жоғары жаңа су сорғыш қондырғы орнатылып, жүйе тексеріледі. Құбыр желісінде ақау анықталса, жөнделеді. Орталық резервуар уақтылы толып, жүйеде ақау болмаса, ауыл тұрғындары үздіксіз таза ауызсумен қамтамасыз етіледі. Сонымен қатар дизель генераторының жұмысы да ретке келтіріледі.
Аққайнар – шалғайдағы ауылдардың бірі, сондықтан мұнда шешімін күткен мәселелердің болуы түсінікті. Ең бастысы – тұрғындардың дауысы партияға жетті, және партияның араласунан кейін мәселелер шешіле бастады. Біз көтерілген әрбір проблеманы түбегейлі шешу үшін жауапты органдармен бірге жұмыс істейміз. Ауызсу мен жол – ауылдың өмір сүру сапасына тікелей әсер ететін факторлар. Сондықтан бұл жұмыстар толық жүзеге асырылғанға дейін партия тарапынан қатаң бақылауда болады, — деді Amanat партиясы облыстық филиалы партиялық бақылау комиссиясының инспекторы Жадігер Канафин.
Асфальт төселмеген учаскеге қиыршық тас төгіліп, тегістелді. «Шығыс Жол» ЖШС өкілінің айтуынша, жөндеу жұмыстары осы аптаның соңына дейін толық аяқталады.
