2024 жылы елімізде 143 жаңа вагон сатып алынған. Бұл туралы бүгін облыс халқымен кездесу барысында көлік вице-министрі Талғат Ластаев мәлім етті, деп хабарлайды F16.kz.
Белгілі болғандай, соңғы 5 жылда вагондардың тозу деңгейі 59%-дан 42%-ға дейін төмендеген. Ал ағымдағы жылдың соңына дейін тағы 175 вагон сатып алу жоспарланған. Осы ретте вагондар негізінен отандық ЗИКСТО және Stadler зауыттарынан шығарылатынын айту керек.
– Соңғы жылдары елімізде жолаушылар вагондарын жаңарту бойынша белсенді жұмыс жүргізілуде. Бұл жұмыс алдағы уақытта да жалғасын табады. Жалпы, 2026-2030 жылдар аралығында 873 вагон сатып алу жоспарланған. Бұл барлық вагондарды ауа баптау жүйесімен қамтамасыз ете отырып, парктың 90%-ын жаңартуға мүмкіндік береді, – деді Талғат Ластаев.
Айта кетейік, қазіргі кезде ШҚО аумағында 11 жұп жолаушылар пойызы қатынайды. Оның ішінде облысішілік, республикалық және трансшекаралық бағыттар да бар.
