Қазақстандық виртуоз-скрипкашы, дирижёр, әлемдік деңгейдегі музыкант Марат Бисенғалиев алғаш рет Өскеменде концерт қояды. Шығыс Қазақстан облысы әкімінің симфониялық оркестрінің сүйемелдеуімен өтетін өнер кеші 8 қарашаға жоспарланған, деп хабарлайды F16.kz.
Марат Бисенғалиев – әлемнің барлық елінде танымал тұлға, талантты орындаушы, халықаралық мәдениетке қосқан үлесі үшін мәртебелі сыйлықтарға, көптеген мемлекеттік марапатқа ие болған.
Әлемге әйгілі Naxos, MarcoPolo, EMI және Sony BMG дыбыс жазу компанияларымен әріптестік нәтижесінде оның жазбалары әлемдік музыка мәдениетінің қазынасына айналды.
Британдық «The Times» газеті Марат Бисенғалиевті «жарқыраған скрипка солисі» деп атаса, америкалық «Fanfare» журналы оны заманауи Изаи деп бағалады.
Марат Бисенғалиев әлемнің үздік оркестрлерімен концерт қойып жүр: Корольдік филармониялық оркестр, Лондон симфониялық оркестрі, Берлин симфониялық оркестрі, Варшава филармониялық оркестрі, Польша халық радиосының оркестрі, BBC Scosh, The Philharmonia, RTVE Madrid, Мәскеу симфониялық оркестрі, Украина ұлттық симфониялық оркестрі, BBC Ulster, Ирландия ұлттық симфониялық оркестрі, Бейжің симфониялық оркестрі және басқа да көптеген ұжыммен Carnegie Hall, Royal Albert Hall, Royal Festival Hall, Barbican, Wigmore Hall, Bridgewater Hall, Waterfront, Sheffield City Hall сахналарында, сондай-ақ Дублин мен Лидстегі «Last Night of the Proms» концертінде өнер көрсеткен.
ШҚО әкімі симфониялық оркестрі – 2002 жылы Сергей Косачевтің бастамасымен және облыс әкімінің қолдауымен құрылған шығармашылық ұжым. Оркестр құрамына халық әртістері Абдуллиндер атындағы өнер училищесінің педагогтары мен үздік студенттері, сондай-ақ балалар музыка мектептерінің оқытушылары кіреді. Оркестрде құрылған күннен бастап еңбек етіп келе жатқан музыканттар да жоғары беделге ие.
Бүгінде оркестрдің шығармашылық қуаты бәсеңдеген жоқ. Бұл – ҚР еңбек сіңірген қайраткері, «Құрмет» орденінің иегері, оркестрдің бас дирижёры Александр Галсановтың еңбегі.
