Енді әлеуметтік желіде құқыққа қайшы контент жариялағандар немесе бөліскендерге айыппұл салынуы мүмкін, деп хабарлайды F16.kz.
Мәжіліс депутаттары «Құқық бұзушылықтардың алдын алу туралы» заң жобасын алғашқы оқылымда мақұлдады. Заң жобасында құқыққа қайшы контентті орналастырғаны және таратқаны үшін әкімшілік жауапкершілік қарастырылған.
Мұндай контентке соғысқа үндейтін, әлеуметтік, нәсілдік, ұлттық, діни артықшылықты насихаттайтын, қатыгездік пен зорлық-зомбылықты, суицидті, порнографияны, есірткі мен психотроптық заттарды дәріптейтін және сепаратизм, алаяқтық идеяларын немесе ұлтаралық және конфессияаралық келісімді бұзуға ықпал ететін ақпараттар жатады.
Бұл мәселеге қатысты заң жобасын әзірлеушісі әрі мәжіліс депутаты Магеррам Магеррамовтың айтуынша, тек контентті жариялағандар ғана емес, оны репост жасағандар да жазалауны мүмкін.
«Онлайн-платформалар және онлайн-жарнама туралы» заңның 14-бабына сәйкес, әкімшілік құқық бұзушылық туралы кодекске өзгерістер енгізілгеннен кейін, құқыққа қайшы ақпаратты таратқандар да, жариялағандар да жазаланады. Видео түсіріп, өз парақшасына орналастырған адам да, ол жазбаға репост жасаған адам да жауапқа тартылмақ, – деді ол.
Депутаттың айтуынша, тіпті видеоны өз парақшасында жариялап «Бұл заң бұзушылық» деп жазса да, құқыққа қайшы контент таратушы болып саналады.
