Шығыс Қазақстан облысында әлеуметтік маңызы бар азық-түлік бағасын негізсіз қымбаттатқан делдал анықталды. Кәсіпкердің заңсыз әрекетін облыстық сауда және тұтынушылардың құқықтарын қорғау департаментінің мамандары әшкереледі, деп хабарлайды F16.kz.
Ведомствоның мәліметінше, кәсіпкер қарақұмық, қант және йодталған тұз сияқты әлеуметтік маңызы бар тауарларды сатып алып, оларды өз иелігіндегі жауапкершілігі шектеулі серіктестік (ЖШС) арқылы қайта сатқан. Осындай «өз-өзіне сату» арқылы тауардың соңғы бағасы негізсіз қымбаттаған. Атап айтсақ, қарақұмықтың үстеме бағасы 127 пайызға жеткен: сатып алу бағасы 241 теңге болса, дүкен сөресінде ол 550 теңгеге қойылған. Сол сияқты қант бағасына 45 пайыз, йодталған тұзға 41 пайыз үстеме қосылған. Айта кету керек, қолданыстағы заңнамаға сәйкес, әлеуметтік маңызы бар азық-түлік тауарларына рұқсат етілген сауда үстемесі 15 пайыздан аспауға тиіс.
Мұндай әрекеттер баға тұрақтылығына тікелей әсер етіп, халықтың әлеуметтік жағдайына салмақ түсіреді. Тексеру нәтижесінде заң бұзу дерегі расталды, – деп хабарлады департамент өкілдері.
Анықталған заң бұзу дерегі бойынша кәсіпкердің үстінен әкімшілік іс қозғалып, айыппұл салынды.
