Шығыс Қазақстан облысының әкімі Нұрымбет Сақтағановтың төрағалығымен өткен кеңесте Altai Invest-2025 халықаралық форумына дайындық мәселелері қаралды, деп хабарлайды F16.kz.
Жиынға бірқатар басқарманың басшылары қатысып, атқарылып жатқан дайындық жұмыстары жөнінде баяндама жасады. Форум бағдарламасын толықтыру және меморандумдардың тақырыптарына қатысты жаңа идеялар ұсынылды. Шетелдік инвесторлармен келіссөздердің белсенді жүргізіліп жатқаны ерекше атап өтілді.
Облыс әкімі жауапты тұлғаларға ұйымдастыру мәселелерін пысықтауды тапсырды. Атап айтқанда, цифрландыру басқармасына форум кезінде жұмыс істейтін БАҚ орталығы үшін үздіксіз байланыс қамтамасыз ету жүктелді.
Altai Invest-2025 сияқты маңызды шараға дайындық пен оны жоғары деңгейде өткізу біз үшін айрықша мәнге ие. Сонымен қатар алдағы жылыту маусымына дайындық жұмыстарын жалғастыру қажет. Көмір сатып алу мәселелері басымдықта қала береді, — деді облыс әкімі Нұрымбет Сақтағанов.
Сондай-ақ аймақ басшысы абаттандыру мәселелерінің де назардан тыс қалмайтынын айтты. Айталық, жолдарда бағдаршамдардың жақсы көрінуін қамтамасыз ету және көшелердің жинақы келбетін қалыптастыру үшін ағаштарды реттеп кесу жұмыстарын жүргізу қажеттігін жеткізді.
