Шығыс Қазақстан облысының Алтай ауданында 17-25 мамыр аралығында “Қауіпсіз жол” жедел-профилактикалық іс-шарасы өтеді. Аталған шараның басты мақсаты – темір жол бойындағы қауіпсіздікті қамтамасыз ету, құқық бұзудың алдын алу және тұрғындар арасында қауіпсіздік мәдениетін қалыптастыру.
Темір жол көлігі – стратегиялық маңызы бар әрі қауіп деңгейі жоғары нысандардың бірі. Сондықтан темір жол бойындағы кез келген абайсыз әрекет адам өміріне қауіп төндіруі мүмкін. Әсіресе белгіленбеген жерден жолды кесіп өту, жүріп келе жатқан пойызға жақындау немесе телефонға алаңдап жүру секілді әрекеттер қайғылы жағдайларға әкеліп соғып жатады.
Профилактикалық іс-шара барысында темір жол аумағындағы қауіпсіздік талаптарының сақталуына бақылау күшейтіліп, тұрғындар арасында түсіндіру жұмыстары жүргізілді. Сонымен қатар құқық қорғау органдары темір жол бойындағы құқық бұзудың алдын алуға бағытталған рейдтік шараларды қолға алды.
Мамандардың айтуынша, балалардың темір жол маңында қараусыз жүруі де өте қауіпті. Сол себепті мамандар ата-аналарға балалардың қауіпсіздігіне ерекше көңіл бөлу қажеттігі ескертті.
Алтай ауданының тұрғындары мен қонақтарына төмендегі қауіпсіздік ережелерін сақтау ұсынылады:
– темір жолды тек арнайы өткелдер арқылы өту;
– жаяу жүргіншілерге арналған белгілер мен ескерту талаптарын сақтау;
– құлаққап тағып немесе ұялы телефонға алаңдап темір жолдан өтпеу;
– балаларды темір жол маңында қараусыз қалдырмау;
– қозғалып келе жатқан пойыздарға жақындамау;
– темір жол бойында бей-берекет жүрмеу.
Мамандар қауіпсіздік талаптарын сақтау – адам өмірі мен денсаулығын қорғаудың басты кепілі екенін еске салады. Темір жолдағы тәртіп пен қауіпсіздікке әр азамат жауапкершілікпен қараған жағдайда ғана қайғылы оқиғалардың алдын алуға болады.
