Шығыс Қазақстан облысының Алтай қаласында 7 мамыр күні күш пен шеберлікті сынға салатын «Алтай батыры – 2026» спорт байқауы ұйымдастырылады. Дәстүрлі және күштік спорт түрлерін қамтитын жарысқа 18 бен 40 жас аралығындағы кез келген ер азамат қатыса алады, деп хабарлайды F16.kz.
Білектілер бәсекесі қаланың мәдениет үйі маңында таңғы сағат 10.00-де басталады. Ұйымдастырушылардың мәліметінше, жарысқа алдын ала тіркеуден өткен және дәрігерден рұқсат алған спортшылар ғана жіберіледі.
Бағдарлама бойынша алғашқы кезеңде қатысушылар қол күрестен сынға түседі. Бұл кезеңде жеңіске жету үшін қарсыласты екі рет жеңу жеткілікті. Одан кейін анағұрлым күрделі тапсырма — 50 келілік штангамен отырып-тұру жаттығуы. Спортшылар 10 минут ішінде мүмкіндігінше көп рет қайталауы керек.
Сондай-ақ бағдарламада 24 және 32 келілік гір көтеруден жеке сайыс жоспарланған. Мұнда да қатысушылар гір тасын белгілі бір уақыт ішінде көбірек көтеруі керек.
Күш сынасудан бөлек, ұлттық спорт түрлері де қамтылған. Атап айтқанда, асық ату ойынында дәлдік пен мергендікті көрсетсе, садақ ату сайысында 10 метр жердегі нысанаға дөп тигізу қажет. Жігіттердің әрқайсына бес мүмкіндіктен беріледі.
Ұйымдастырушылардың айтуынша, мұндай жарыстар ұлттық спортты насихаттаумен қатар, салауатты өмір салтын қалыптастыруға және жастардың спортқа қызығушылығын арттыруға ықпал етеді.
