Биыл жазда Катонқарағай ауданында Төр Алтайдың қылау түспеген тұмса табиғатын тамашалап, көрікті жерлерін көрсететін «Ақ берел» туристік бағыты ашылады. Бұл туралы Шығыс Қазақстан облысының Кәсіпкерлер палатасында өткен экотуризмді дамыту және инвестициялық жобаларды іске асыру мәселесін талқылаған жиында мәлім болды, деп хабарлайды F16.kz.
Алтайдың кереметін көруге мүмкіндік беретін бағыттарды Катонқарағай мемлекеттік ұлттық табиғи паркі ұсынып отыр. Бұл бағыттардың басты артықшылығы – Алтайдың көркем табиғатына зиян келтірмейді.
Басым жобалардың бірі – 34 шақырым болатын «Ақ Берел» бағыты. Бұл жаяу және атпен жүретін, 7–10 күнге есептелген саяхат. Бағыт Қаракөл маңын қамтиды. Жол бойында глэмпинг, киіз үй қалашықтары және шағын шатырлы лагерьлер салу жоспарланған. Жоба жаппай туризмге емес, шағын топтарға арналған.
Сонымен қатар 30 шақырымға созылған «Орман жолдары» бағыты ұсынылды. Ол 2–3 күндік жаяу, атпен және автокөлікпен жүруге арналған. Жоба аясында бақылау алаңдары, демалыс орындары, автотұрақтар мен санитарлық аймақтар жасақталады.
Катонқарағай ұлттық паркі бүгінде тек қорғалатын табиғи аумақ емес, сонымен қатар экотуризмнің тартымды орталығына айналып келеді. Біз туристерге Алтай табиғатымен танысуға мүмкіндік беретін, табиғатқа зиян келтірмейтін бағыттарды дамытуды ұсынамыз, — деді Катонқарағай МҰТП бас директорының орынбасары Александр Кобзев.
Болашақта Ақ Берел өзенін бойлап жүретін су бағытын ашу және Бұқтырма көлінде туристік-экскурсиялық турлар ұйымдастыру жоспарланған.
Катонқарағай ауданы әкімдігінің мәліметінше, бизнес тарапынан экотуризмге қызығушылық жоғары. Инвесторлар экологиялық қонақүйлер, глэмпингтер, киіз үй қалашықтары және сервистік нысандар салуға дайын.
Мұндай жобалар туристер санын арттырып қана қоймай, жаңа жұмыс орындарын ашуға және аудан бюджетінің кірісін көбейтуге мүмкіндік береді.
Сала мамандары экотуризмді дамыту жол, көпір, байланыс және инженерлік желілерді жаңарту жұмыстарымен қатар жүруге тиіс екенін атап өтті.
