Бүгін, Өскеменде өткен «Altay Invest-2025» инвестициялық форумында 40-тан астам меморандумға қол қойылды, олардың жалпы сомасы 740 млрд теңге, деп хабарлайды F16.kz.
Инвестицияның басым бөлігі энергетика, агроөнеркәсіп кешені, туризм және көлік инфрақұрылымы салаларына бағытталмақ. Тек су электр энергиясын дамытуға ғана 300 млрд теңгеден астам инвестиция тартылмақ. Нәтижесінде өңірде бірнеше ірі су электр станциясы салынады. Оның ішінде қуаты 200 МВт, құны 200 млрд теңге болатын Үбі өзеніндегі шағын СЭС пен 87 млрд теңгеге бағаланған Шемонаиха ауданында (Үлбі өзені) жүзеге асырылатын жоба бар.
Қытайлық әріптестермен жасалған келісімдер де айрықша маңызға ие. Құны шамамен 108 млрд теңге болатын жоғары сапалы ауыл шаруашылығы жерлерін құру жөніндегі ауқымды Қытай-Қазақстан жобасы, сондай-ақ Шаньдун провинциясының Ауыл шаруашылығы ғылымдары академиясы мен Шығыс Қазақстан техникалық университетінің ғылыми ынтымақтастық туралы келісімі бар. Бұл агроөнеркәсіп секторына озық технологияларды енгізуге жаңа мүмкіндіктер ашады.
Инфрақұрылымдық жобалар да назардан тыс қалған жоқ: Өскемендегі Серікбаев көшесін ұзарту және кейін Ертіс өзенінің үстінен көпір салу жобасы 115 млрд теңгеге бағаланды. Ал әйгілі Марқакөлге апаратын автожол құрылысы 62 млрд теңге тұрады. Бұл жобалар көлік қатынасын арттырып қана қоймай, туризм мен бизнесті дамытуға мықты негіз болады.
Сондай-ақ болашағы зор бағыттардың бірі ретінде Катонқарағай ауданында қонақүй кешенін салу, Сібе көлдерінде демалыс аймағын дамыту, Күршімде заманауи кәріз тазалау нысандарын және қоқыс өртеу арқылы электр энергиясын өндіретін станция салу, жаңа ет комбинаттары, ауыл шаруашылығы қалдықтарын өңдеу және құрылыс материалдарын шығаратын өндірістерді іске қосу жоспарда бар.
Шығыс Қазақстан облысының әкімі Нұрымбет Сақтағанов мұндай нәтижелер инвесторлармен сенімді диалог орнату мен бизнесті дамытуға қолайлы жағдай жасауға бағытталған жүйелі жұмыстың арқасында мүмкін болғанын атап өтті.
Бүгінгі форум аясында жалпы құны 740 млрд теңге болатын 40-тан астам меморандумға қойыл қойылды. Нәтижесінде өңірімізде жұмыс істеп тұрған нысандар қайта жарақтандырылып, жаңа инвестициялық жобалар жүзеге асырылады. Бұл өңірдің дамуына қуатты серпін береді деп есептейміз. Осы жобаларды жүзеге асыруға бізде барлық мүмкіндік бар. Қазба байлық та, жер үстінің байлығы да, ең бастысы еңбекқор халқымыз бар. Жергілікті билік өз тарапынан инвесторларға еліміздің заңнамаларына сай тиісті қолдау көрсетеді, – деді аймақ басшысы.
«Altay Invest-2025» форумы Шығыс Қазақстанның орасан инвестициялық әлеуеті бар екенін және халықаралық серіктестермен ынтымақтастық өңірді жаңа экономикалық даму деңгейіне шығаратынын көрсетті.
