«Altay invest-2025» инвестициялық форумы аясында «Шығыс Қазақстан облысын 2030 жылға дейін дамыту стратегиясы» тақырыбында пленарлық отырыс өтті, деп хабарлайды F16.kz.
Облыс әкімі Нұрымбет Сақтағанов жиын барысында өңірдің әлеуметтік-экономикалық дамуының негізгі бағыттарын атап өтіп, басымдықтардың бірі ретінде шикізаттық үлгіден бас тарту және тереңдетіп өңдеуді дамыту қажеттігіне баса назар аударды.
Мемлекет басшысы Қасым-Жомарт Тоқаев өңірлерге экономиканы әртараптандыру, экспортты дамыту және инвестиция тарту жөнінде нақты міндеттер қойды. Бұл форум аясында біз тың идеяларды жүзеге асырып, жаңа ұсыныстар қабылдайтынымызға сенеміз. Осы арқылы агроөнеркәсіп, қайта өңдеу, энергетика және туризм салаларында жаңа даму орталықтары ашылуға тиіс. Біз өз кезегімізде білікті кадрлар даярлауға, көлік және инженерлік инфрақұрылымды дамытуға, барлық процестерді цифрландыруға ерекше көңіл бөлеміз, — деді аймақ басшысы.
Пленарлық пікірталасқа қатысқан «Казцинк» ЖШС бас директоры Жанат Жанботин өңір экономикасының негізі ретінде өнеркәсіптің маңызын атап өтті.
Парламент Сенаты төрағасының орынбасары Жақып Асанов шетелдік және отандық қатысушыларға алғыс айтып, аймақтың әлеуетін ерекше атап өтті.
Шығыс Қазақстан – көне тарих пен жаңа табыстар тоғысқан өңір. Біз Парламент тарапынан инвесторларға барынша қолайлы жағдай жасауға дайынбыз, – деді ол.
Жиынға Қазақстанмен қатар Ресей, Қытай, Түркия, Өзбекстан, Армения, Әзірбайжан және Моңғолиядан келген қонақтар, инвесторлар мен бизнес өкілдері қатысты. Бес елден 106 қатысушы жиналған бұл форум облыстың ғана емес, ел экономикасына оң әсерін тигізері анық.
