Қазақстанда алтын мен мыстың жаңа кен орындары табылды. Оның бірі Шығыс Қазақстан облысы аумағында орналасқан, деп хабарлайды F16.kz.
Бұл туралы өнеркәсіп және құрылыс вице-министрі Иран Шархан Үкімет отырысында айтты. Жер қойнауын пайдалану және геологиялық барлау саласындағы ахуалды баяндаған ол елдегі алтын қорының көлемі 98 тоннаға артқанын атап өтті.
Геологиялық барлау жұмыстарының нәтижесінде алғаш рет бес кен орны мемлекеттік есепке алынды. Олар – Көк-Жон, Алтын-Шоқы, Самомбет, Студенческий және Тақыр-Қалжыр кен орындары. Қор көлемі 98 тонна алтынға, 36 мың тонна мысқа, 11 миллион тонна марганецке және 1,3 миллион тонна фосфоритке артты, – деді Иран Шархан.
Вице-министр қазір ел бойынша 103-тен астам түрлі пайдалы қазба және 10 мыңға жуық кен орны мемлекеттік есепке алынғанын, сондай-ақ, қолданыста 2,9 мыңнан астам лицензия және 250-ге жуық қатты пайдалы қазбалар бойынша келісім-шарт бар екенін хабарлады.
Геологиялық барлау нәтижесінде мемлекеттік есепке алынған бес кен орнының бірі — Тақыр-Қалжыр кеніші Шығыс Қазақстан облысының Марқакөл ауданында орналасқанын айта кеткен абзал.
