Жастардың еңбегі мен жетістіктерін дәріптеуге бағытталған «Jas Keñes Siyligi» тәуелсіз жастар сыйлығы биыл жаңа форматта өтеді, деп хабарлайды F16.kz.
Байқау еліміздің экономикасы мен қоғамдық өмірінің түрлі салаларында өз кәсібінде жоғары нәтижеге жеткен, 35 жасқа дейінгі белсенді жастарды қолдауға бағытталған.
Жобаның ауқымы биыл бұрынғыдан да кеңейіп отыр. Өткен жылы 7 номинация ұсынылса, биыл олардың саны 10-ға дейін ұлғайды. Сонымен қатар жаңа бағыттар енгізілді. Енді байқауға жас ғалымдар, жоғары оқу орындарының оқытушылары мен дәрігерлер, ақпараттық-коммуникациялық технологиялар, креативті индустриялар және атом өнеркәсібі салаларының жас мамандары да қатыса алады, — деді ҚР Президенті жанындағы Жастар саясаты жөніндегі кеңес мүшесі Бақытжан Ерболқызы.
Жаңа номинациялар тізімі төмендегідей бекітілді:
- «Janqıarlyq» – ішкі істер органдары мен қарулы күштер қызметкерлеріне;
- «Altyn jürek» – дәрігерлер мен орта және кіші медицина қызметкерлеріне;
- «Önerkäsıp» – өңдеу өнеркәсібі, тау-кен-металлургия кешені және өзге өндірістік сектор өкілдеріне;
- «Bolaşaq turaly qamqorlyq» – инклюзивті оқу орталықтары мен әлеуметтік қызмет көрсету мекемелері қызметкерлеріне, сондай-ақ волонтерлерге;
- «Bılım jäne Ğylym» – білім беру ұйымдарының педагогтеріне, ғалымдар мен ғылыми қызметкерлерге;
- «Qaisar» – авариялық-құтқару қызметі мен азаматтық қорғаныс жүйесінің қызметкерлеріне;
- «Altyn qol» – жұмысшы мамандықтарының өкілдеріне және елді мекендердің тіршілігін қамтамасыз ету саласындағы мамандарға;
- «Zharyq» – энергетика, мұнай-газ және атом өнеркәсібі салаларының қызметкерлеріне;
- «Örken» – агроөнеркәсіп кешені мен азық-түлік өндірісі саласындағы мамандарға;
- «Örleu» – ақпараттық-коммуникациялық технологиялар және креативті индустриялар өкілдеріне арналған.
Байқау шарты бойынша үміткерлердің жасы 35-тен аспауы тиіс. Өтінімдерді қабылдау 20 маусым мен 20 шілде аралығында жүргізіледі. Қатысушылар өтініштерін онлайн түрде www.jas-kenes.kz/application сайтында тапсыра алады.
Конкурс үш кезеңнен тұрады. Қорытындысында әр номинация бойынша екі жеңімпаздан, жалпы саны 20 жеңімпаз анықталады. Жүлде қоры – 20 миллион теңге, әр жеңімпазға 1 миллион теңге көлемінде ақшалай сыйлық табысталады.
Жобаның толық ережелері мен байқауға қатысу шарттары туралы мәліметті www.jas-kenes.kz сайтынан алуға болады.
