Шығыс Қазақстан облысында Amanat партиясы әйелдер қанатының бастамасымен «Amanat керуені» әлеуметтік акциясы басталды. Ауыл тұрғындарының өмір сүру сапасын жақсартуға бағытталған жобаның алғашқы іс-шарасы Самар ауданында өтті, деп хабарлайды F16.kz.
Акцияның басты мақсаты — ауыл халқына тегін медициналық тексеру ұйымдастыру, мемлекеттік қолдау шаралары мен партиялық жобаларды түсіндіру және кәсіпкерлікті дамыту бойынша кеңес беру.
Amanat партиясы облыстық филиалының төрағасы Жанат Мекеева жобаның маңыздылығына тоқталды.
«Amanat керуені» – халыққа нақты көмек көрсетуге бағытталған маңызды жоба. Бүгінде ауыл тұрғындарына білікті дәрігерлердің қабылдауында болу, әлеуметтік және құқықтық мәселелер бойынша кеңес алу өте өзекті. Біз алдағы уақытта да адамдардың өмір сүру сапасын жақсартуға бағытталған кешенді шараларды жалғастыра береміз, — деді Жанат Мекеева.
Іс-шара аясында Өскемендегі Онкология және хирургия орталығының онколог, маммолог, гинеколог, уролог қатарлы білікті мамандары мен УДЗ дәрігерлері тұрғындарды қабылдады. Сонымен қатар Astana Vision клиникасының офтальмологтары заманауи құрылғылардың көмегімен адамдардың көзін тексерді.
Әйелдер қанатының жетекшісі, Astana Vision клиникасының директоры Зарина Камасова ауылдағы кадр тапшылығы мәселесін атап өтті.
Самар ауданында 10 жылдан бері офтальмолог дәрігері жоқ. Сондықтан біз арнайы жабдықтармен келіп, толық диагностика жасап, көзілдірік жазып беріп жатырмыз. Дәрігер ретінде айтарым, мұндай акциялар ауыл халқына өте қажет, — деді Зарина Камасова.
Бұдан бөлек акция аясында халыққа қызмет көрсету орталығы, жұмыспен қамту басқармасы және қаржы институттарының өкілдері мемлекеттік қызметтер мен қайтарымсыз гранттар бойынша кеңес берді. Мектеп түлектеріне кәсіптік бағдар беру жұмысы жүргізілді.
Айта кетейік, «Amanat керуені» акциясы мамыр-шілде айларында облыстың барлық аудандарында тұрақты түрде өткізіліп, Шығыс Қазақстанның барлық елді мекендерін қамтитын болады.
