Америкалық авто-саяхатшы әрі танымал блогер Connor (@camperghini) халықаралық автотур аясында Қазақстанға ат басын тіреді. Алматыда оны «Kazakh Tourism» ұлттық компаниясының басқарма төрағасы қарсы алып, мегаполистің туристік әлеуетімен таныстырды, деп хабарлайды F16.kz.
Сапар барысында блогер Алматының негізгі көрнекті орындарын аралады. Атап айтқанда, Вознесенск кафедралды соборы, Шымбұлақ тау-шаңғы курорты, Көктөбе және Медеу мұз айдынына барып, қаланың мәдени және табиғи ерекшеліктерін көрді. Сонымен қатар ол өңірдің этномәдени мұрасымен және туристік инфрақұрылымымен танысты.
Алматыдан кейін Connor сапарын облыс аумағында жалғастырды. Автотур бағдарламасы аясында Шарын шатқалында болып, Қазақстанның бірегей табиғаты туралы фото-видео материалдар түсірді. Шетелдік блогер бұл сапардан алған әсері туралы айтып, ұйымдастырушыларға алғысын білдірді.
Қазақстанның Туризм және спорт министрлігіне көрсеткен қолдауы үшін алғыс білдіремін. Әсіресе, Талғатты ерекше атап өткім келеді. Ол бүкіл турды жоғары деңгейде ұйымдастырып, сапарды барынша жайлы әрі қызықты етті. Маршруттың барлық кезеңінде бізбен бірге болып, қолдау көрсетті, – деді Connor.
