Катонқарағай мемлекеттік ұлттық табиғи паркінің Аршаты орманшылығында үш аланын (күшігі) ерткен қар барысының аналығы фототұзаққа түсіп қалды. Алтайдың қарлы шыңдарын мекендейтін жыртқыштың дәл осылай күшігін ертіп, төменге түсуі сирек кездесетін құбылыс дейді мамандар. Фото-видеоны ұлттық парк қызметкерлері жариялады, деп хабарлайды F16.kz.
Мамандардың айтуынша, барыстың төлдері шамамен екі жыл бойы аналығының жанында болады. Осы уақыт ішінде олар аң аулауды, тау-тасты кезіп, бағыт табуды және түрлі қауіптен қорғануды үйренеді. Бірден үш аланның көзге түсуі бұл өңірде барыстың көбеюі тұрақты екенін білдіреді. Бұл ұлттық парк аумағында сирек кездесетін жануарлардың көбеюіне қолайлы жағдай жасалғанының дәлелі.
