8 наурыз – Халықаралық әйелдер күніне орай Қазақстан Республикасының Қарулы Күштері қатарында дәстүрлі «Әскер аруы – 2026» фотобайқауы басталды.
Байқаудың мақсаты – әскери қызметтің беделін арттыру, армияның оң имиджін қалыптастыру және еліміздің қорғаныс қабілетін нығайтудағы әйел әскери қызметшілердің рөлін кеңінен насихаттау.
Биылғы байқауға Қарулы күштердің түрлері, әскер тектері мен өңірлік қолбасшылықтар, сондай-ақ Қорғаныс министрлігі мен Бас штабтың құрылымдық бөлімшелерінен 40-тан астам әскери қызметші әйел қатысып жатыр. Қатысушылар әскери қызметті жеке және кәсіби дамумен үйлестіре отырып, жоғары жауапкершілік, біліктілік және бастамашылдық қасиеттерімен ерекшеленеді.
Онлайн дауыс беру 2026 жылғы 27 ақпан мен 3 наурыз аралығында Қорғаныс министрлігінің Instagram әлеуметтік желісіндегі ресми парақшасында өтеді. Ең көп «ұнайды» белгісін жинаған қатысушы байқау жеңімпазы атанады.
Жеңімпаздарды салтанатты марапаттау рәсімі Халықаралық әйелдер күні қарсаңында Астанада өтеді.
