Бүгін Ұлы Отан соғысының ардагері Михаил Яковлевич Головатюк 100 жасқа толды. Майдангерді Шығыс Қазақстан облысының Қорғаныс істері жөніндегі департаментінің қызметкерлері құттықтады, деп хабарлайды F16.kz.
Михаил Яковлевич 1927 жылы 15 қазанда Иркутск облысының Кутулин ауылында дүниеге келген. 1943 жылы 16 жасында еңбек армиясына шақырылып, Иркутск пен Байкал арасындағы темір жол құрылысында жұмыс істеді. Ал 1944 жылдың қарашасында әскер қатарына алынып, майданға аттанды.
Соғыс жылдары Михаил Яковлевич 579-шы атқыштар полкінің құрамында жапон әскеріне қарсы шайқастарға қатысып, автоматшы болды. Ерлігі мен батырлығы үшін ІІ дәрежелі Отан соғысы орденімен, Ленин орденімен және «Жапонияны жеңгені үшін» медалімен марапатталды.
1951 жылы наурыз айында әскерден босатылып, Омбы облысындағы ата-анасына оралады. Біраз уақыт жүргізуші болып еңбек етеді. 1952 жылы Өскемен қаласына көшіп келіп, Қорғасын-мырыш комбинатына жұмысқа орналасады. Алдымен балқыту цехында балқытушы болып, кейін рафинация цехында еңбектенді. Комбинатта 35 жыл бойы табанды еңбек етіп, кейін зейнетке шыққан.
Михаил Яковлевичтің өмір жолы — ерлік пен төзімділіктің, адал еңбектің үлгісі. Оның Отанға деген сүйіспеншілігі мен ерен еңбегі көпке үлгі. Оқ пен оттың ортасынан келген ардагерлерді өскелең ұрпақ ұмытпауға тиіс, — дейді Өскемен қаласы Қорғаныс істері жөніндегі басқармасының тәрбие және идеологиялық жұмыстар тобының бастығы майор Сырым Ақтаев.
Сонымен қатар әскери қызметшілер ардагерге естелік сыйлықтар мен Қазақстан Республикасының Қорғаныс министрі, авиация генерал-лейтенанты Дәурен Қосановтың атынан құттықтау хатын табыстады.
