Биылғы 30 маусым мен 6 шілде аралығында Астанада ерлер мен әйелдер арасында бокстан Әлем кубогы үшін жарыс өтеді. Додаға 30 елден 300-ге жуық боксшы қатысады, деп хабарлайды F16.kz.
Қазіргі уақытта елорда төрінде отандық спортшылармен қатар, АҚШ, Канада, Сербия, Франция, Финляндия, Швеция, Швейцария, Әзербайжан, Аустралия, Словакия, Норвегия және Германия боксшылары бірлескен жаттығулар өткізіп жатыр.
Туризм және спорт министрлігінен хабарлағандай, Қазақстан құрамасының Әлем кубогы үшін жарысқа қатысатын құрамы осы жаттығу жиынының қорытындысы бойынша белгілі болады.
Жарыстар Жақсылық Үшкемпіров атындағы Жекпе-жек сарайында өтеді. Ашылу салтанаты 30 маусым күні сағат 13:00-де, ал финалдық жекпе-жектер 6 шілде күні сағат 14:00-де басталады.
