Шемонаиха ауданының тұрғыны, жеке кәсіпкер Айым Қабылбаева Amanat партиясының бастамасымен жүзеге асырылып жатқан «Ауыл аманаты» жобасы аясында 2,5 пайызбен жеңілдетілген несие алып, тігіншілік кәсібін бастады, деп хабарлайды F16.kz.
Алынған 8 млн теңге қаражатқа тігін машиналарының бірнеше түрін, DTF-принтер, түрлі тігін фурнитуралары мен қажетті құрал-жабдықтар сатып алынды.
Қазір ол өзінің шағын шеберханасында ұлттық нақыштағы және заманауи үлгідегі киімдер тігеді. Кәсіптің арқасында қосымша жұмыс орны ашылып, жергілікті тұрғындар да еңбекке тартылды.
Айым Қабылбаеваның айтуынша, жобаның тиімділігі – қаржыландыру мен нақты қолдауда.
Көп жылдан бері тігіншілікпен айналысуды ойлағанмен қолымда қаражат болмаған соң кәсіп бастау қиындық туғызды. Қажетті құрал-жабдық алу керек. «Ауыл аманаты» жобасын естіген соң қатысуды жөн көрдім. Енді өз ісімді кеңейтіп, сапалы отандық өнім шығаруға ниеттімін. Аmanat партиясына және мемлекетке көрсетіп жатқан көмек-қолдауы үшін алғысым шексіз, – деді ол.
Қазір кәсіпкердің ай сайынғы таза табысы шамамен 300 мың теңге көлемінде. Бұл жоба ауыл әйелдерінің кәсіпкерлік әлеуетін арттырумен қатар өңірдің экономикалық дамуына да үлес қосады.
