Ұлан ауданының Тоғанас ауылында жаңа туристік демалыс аймағы салынып жатыр. «Ауыл аманаты» жобасы аясында басталған демалыс үйлерінің құрылысы аяқталуға жақын, деп хабарлайды F16.kz.
Жергілікті кәсіпкер Меруерт Бауыржанқызының айтуынша, демалыс аймағында демалушылар үшін барлық қолайлы жағдайлар жасалады. Жайлы демалыс үйлері, балалар ойын алаңы мен отбасылық демалыс аймақтары және табиғи таза тағамдар ұсынатын асхана да болмақ.
Өз ауылымда туризм саласын дамыту көптен ойымда жүрген. Осы орайда «Ауыл аманаты» жобасы үлкен мүмкіндік болды. Демалыс үйлерінің құрылысы көп ұзамай аяқталады. Тек жаз мезгілінде емес, жыл он екі ай бойы келушілерге қызмет көрсететін заманауи демалыс аймағын ашпақпыз, – дейді кәсіпкер.
Мұнда қыста қонақтар атқа міну және табиғат аясында демалу, ал көктем мен күзде экотуризм бағытындағы шаралар ұйымдастырылмақ. Бұл бастама ауыл тұрғындары үшін жаңа жұмыс орындарын ашуға, сондай-ақ ауыл экономикасын дамытуға жол ашады.
Осындай жобалар арқылы ауылда өмір сапасын арттырып, туризм мен шағын бизнесті дамытамыз, – дейді Меруерт Бауыржанқызы.
Жаңа туристік нысанның ашылуы Тоғанас ауылының дамуына тың серпін беріп, өңірдің ішкі туризм әлеуетін арттыруға үлес қосатыны сөзсіз.
