Алтай ауданының Соловьево ауылында жеке тұрғын үй өртеніп, ішінде кішкентай балалар қалып қойған. Көмекке келген ауыл тұрғыны отқа оранған үйден бүлдіршіндерді аман алып шықты, деп хабарлайды F16.kz.
Өртті ең бірінші Соловьев орта мектебінің денешынықтыру және алғашқы әскери даярлық пәнінің мұғалімі Руслан Сейітов байқаған. Ол бірден көмекке ұмтылған. Қою түтін мен қызыл жалыннан үйге кіру мүмкін болмаған соң ол уақыт жоғалтпай терезені сындырып, іштегі екі баланы сыртқа алып шыққан. Қатты аязда тоңып қалмас үшін оларды бірден өз үйіне апарып, жылы жерге орналастырған. Көршілерге өрт туралы хабар берген. Іле-шала өртеніп жатқан үйге қайта жүгіріп барып, іште қалған қарт адамға көмектескен.
Ауыл адамдары басын қауіп-қатерге тіге отырып тілсіз жаудың тұтқынында қалған адамдарға жәрдем берген Руслан Сейітовтің әрекеті ерлікке пара-пар дейді. Ал Русланның өзі мұндай қиын-қыстау сәтте кез келген қол ұшын беруден бас тартпайтынын айтады.
