ҰЛан ауданы әкімдігінің қолдауымен Өскемендегі Назарбаев зияткерлік мектебі мен «Багратион Ұлан» ЖШС арасында ынтымақтастық туралы меморандумға қол қойылды. Келісім Пролетарка негізгі мектебінің әлеуетін арттыруға, білім беру сапасын жаңа деңгейге көтеруге бағытталып отыр, деп хабарлайды F16.kz.
Меморандум аясында білім беру үдерісін жаңғырту, заманауи технологияларды енгізу және педагогтердің кәсіби біліктілігін арттыру бойынша кешенді жұмыстар жүргізіледі.
Алдағы уақытта зияткерлік мектептің тәжірибелі ұстаздары Пролетарка негізгі мектебіне әдістемелік қолдау көрсетіп, өз білімдері мен озық тәжірибелерін бөліспек. Сонымен қатар ауыл мектебінің оқушылары NIS жазғы мектебіне қатысу мүмкіндігіне ие болды.
Бұл бастаманың түпкі мақсаты – шағын ауылдағы білім сапасын көтеріп қана қоймай, елді мекеннің әлеуметтік жағдайын нығайту. Білімді ұрпақ – ауылдың тірегі. Демек, бұл ынтымақтастық ауылдың болашағына салынған сенімді инвестиция.
