Өскеменде «Ауыл» партиясының бастамасымен «Конституциялық реформа – елдің ұзақ мерзімді дамуының негізі» атты диалог алаңы өтті. Іс-шараға жастар, сарапшылар және қоғам өкілдері қатысып, жаңартылған Конституция төңірегінде ашық пікір алмасты, деп хабарлайды F16.kz.
Кездесудің басты мақсаты – жаңартылған Конституция жобасының негізгі ережелерін жан-жақты талқылап, оны іс жүзінде тиімді жүзеге асыруға қатысты кәсіби ұсыныстар әзірлеу. Сонымен қатар ұйымдастырушылар жастардың құқықтық сауатын арттыруға, олардың белсенді азаматтық ұстанымын қалыптастыруға ерекше мән берді. Жиында алдағы 15 наурызда өтетін жаңа редакциядағы Ата заң бойынша референдумға қолдау көрсету мәселесі де қозғалды.
Партия төрағасының орынбасары Ғалымжан Құсманғали алдағы референдум қоғам үшін маңызды мүмкіндік екенін атап өтті. Оның айтуынша, бұл қадам мемлекеттік институттарға деген сенімді нығайтып, ел болашағын бірге айқындауға жол ашады.
Бүгінгі басқосудың мақсаты – жыл басынан бері жүзеге асып жатқан конституциялық реформаның мән-маңызын түсіндіру. Біз Конституция жобасының мазмұнын, оның ішінде жастарға беретін мүмкіндіктерін қарапайым әрі түсінікті тілмен жеткізуге тырыстық, – деді ол.
Парламенттегі «Ауыл» фракциясы аппаратының жетекшісі Жазира Сұлтанқұлова конституциялық реформа тек заңнаманы жаңарту емес, сонымен қатар ауыл-аймақтағы білім беру мен әлеуметтік бастамаларды қолдаудың тиімді құралы екенін айтты. Оның пікірінше, жаңа нормалар қоғамдағы сенімді арттырып, азаматтық жауапкершілік пен белсенділікті күшейтуге бағытталған.
Талқылауға облыстық Жастар ресурстық орталығының директоры Айдос Әділбеков, облыстық Қоғамдық кеңестің төрағасы, «ШҚО талдау және болжау институты» ЖШС директоры, «ШҚО Азаматтық альянсы» ЗТБ жетекшісі Аяужан Әшімова, сондай-ақ «Auyl Jastary» жастар қанатының төрағасы Дәурен Рахымбек және басқалар қатысты.
Аяужан Әшімова бұл кездесудің мазмұнды әрі маңызды болғанын атап өтті.
Бұл жиында біз Конституция баптарын құрғақ баяндап қана қоймай, оны нақты мысалдар арқылы түсіндіруге тырыстық. Әр азамат үшін Конституция қалай жұмыс істейтінін көрсету маңызды болды, – деді ол.
Конституциялық комиссия мүшесі ретінде ол Ата заңдағы бірқатар жаңашылдыққа тоқталып, жастардың сұрақтарына жауап берді.
Кездесу барысында партия өкілдері, қоғамдық ұйымдар және жастар арасында ашық әрі мазмұнды диалог өрбіді. Тараптар нақты ұсыныстарын айтып, пікір алмасты.
