Мемлекет басшысы Қасым-Жомарт Тоқаев Қазақстан халқына кезекті Жолдауында 2026 жылдың ортасына дейін мемлекетке қайтарылған жердің бәрін тұрақты айналымға енгізуді тапсырды, деп хабарлайды F16.kz.
Сондай-ақ ауыл шаруашылығы жерлерін беру тәсілін өзгерту қажеттігін де атап өтті.
Жер – стартегиялық ресурс. Оның бар игілігі халықтың тұрмысын жақсартуға арналуы керек. Игерілмей бос жатқан, заңсыз алынған жерді қайтарып, оны қайта бөлу туралы тапсырма бердім. Жер иесіз қалмауға тиіс. Жерді тек қана оның қадірін білетін азаматтарға беру керек. 2022 жылдан бері жалпы аумағы 13,5 млн гектардан астам жер қайтарылды. Бірақ әкімдер соның 6 млн гектарын ғана жаңа жер иеленушілерге бөліп берген. Иесін тапқан жер өндірістің ошағына, инвестиция көзіне, қайнаған еңбектің ортасына айналуы қажет. Бұл анық нәрсе, — деді Президент.
Тоқаев әкімдерге қайтарылған жердің бәрін келесі жылдың ортасына дейін тұрақты айналымға енгізуді тапсырды. Бұл шара арқылы жайылым тапшылығы мәселесі де шешілуге тиіс.
Жер қатынастарына қатысты заңсыздық пен қағазбастылықты жою қажет. Сол үшін ауыл шаруашылығы жерін беру тәсілін түбегейлі өзгерту керек. Осыған орай жерді бөлуге қатысты шешім цифрлық форматта, электронды конкурстар арқылы қабылдануға тиіс. Үкімет жыл соңына дейін заңнамаға тиісті өзгертулер ұсынуы қажет, — деп тапсырды Мемлекет басшысы халыққа Жолдауында.
