Шығыстағы қаңырап қалған шекаралық аудандарды дамыту үшін арнайы заң жобасы қабылданып, тиісті бағдарлама әзірленбек. Бұл туралы жұмыс сапарымен Марқакөл, Күршім аудандарында халықпен кездескен Парламент Мәжілісінің депутаты Мақсат Толықбай айтты.
Ауылда ешкімді күштеп ұстап отыра алмайсың. Президенттің нақты тапсырмасы бар, соған сәйкес күзден бастап шекаралық аймақтарды дамыту бойынша заң жобасын әзірлейміз. Түркістанға жеке мәртебе берілді ғой, бұл аймақтарға (шекаралық аймақ – ред.) да сондай мәртебе беру қажет. Бұл мәселенің көтеріліп келе жатқанына 10 жыл болды. Ең әуелі заң жобасы керек, бағдарлама әзірлеу қажет. Шекарадағы елмен кездесудегі мақсатымыз олардың ұсыныс-тілектерін тыңдау, жергілікті жағдаймен жақын танысу, – деді Мақсат Толықбай.
Оның айтуынша, шекаралық аймақ тұрғындарының жылдар бойы қордаланған әлеуметтік мәселелерін шешу үшін жеңілдіктер қарастырылады. Мәселен, депутаттар бір жылдық еңбек өтілін бір жарым жылға есептеуді ұсынып отыр, яғни адамдардың зейнетке ерте шығуға мүмкіндігі болады. Елдің шетінде, желдің өтінде тұрып жатқан халықтың жалақысына 50 пайыз көлемінде үстеме қосу жағы да назарға алынған. Бұдан бөлек арнайы бағдарлама әзірленіп, жеңілдетілген несие де берілмек. Арзандатылған несие қаражаты кәсіп ашуға, ауыл шаруашылығын дамытуға, оның ішінде мал басын көбейтуге жұмсалмақ.
