ШҚО-да тексеру комиссияның отырысы өтті. Онда антенна-мачталық құрылыстарға, «Қолжетімді интернет» ұлттық жобасын іске асыруға және табиғи монополиялар саласындағы цифрландыруға бөлінген қаражаттың тиімді жұмсалуына жүргізілген аудиттің нәтижелері қаралды, деп хабарлайды F16.kz.
Аудит нәтижелері бойынша, ауылдарды интернетпен қамтамасыз ету жұмыстары кезең-кезеңімен жүзеге асырылып жатқаны айтылды. 2021–2024 жылдар аралығында «Ауылтелеком» ЖШС мен «Кар-Тел» ЖШС келісімшартқа сәйкес 54 елді мекенге интернет жеткізуді жоспарласа, оның бүгінде 25-і желіге қосылған.
2023–2024 жылдар аралығында 16 ауылға 18 антенна-мачталық құрылғы орнату көзделген. Бүгінгі таңда олардың үшеуі мобильді байланысқа қосылған. Бұдан бөлек, 39 ауылдың төртеуі спутниктік арналар арқылы интернетке қол жеткізіп отыр.
Сонымен қатар 108 ауылдық елді мекенді қамтитын сымды инфрақұрылымды дамыту жұмыстары да жалғасып жатыр.
Комиссия ұлттық жобаны тиімді іске асыру, белгіленген мақсаттарға уақтылы қол жеткізу үшін аудит нысандарына бірқатар ұсынымдар мен нұсқамалар берілгенін атап өтті. Сонымен қатар, әкімшілік құқықбұзушылық белгілері бар кейбір материалдар уәкілетті органдарға жолданды.
