Қылмыстық топ басшысы «Дикий Арман» лақап есімімен белгілі Арман Жұмагелдиевтің сыбайласы Біріккен Араб Әмірліктерінен (БАӘ) экстрадицияланды, деп хабарлайды F16.kz.
Қазақстанның Бас прокуратурасы мен Ішкі істер министрлігінің қызметкерлері БАӘ-дағы Қазақстан елшілігінің қолдауымен Арман Жұмагелдиевтің сыбайласын елге жеткізді.
Ресми деректерге сүйенек, ол 2022 жылғы 5-7 қаңтарда Алматыда Жұмагелдиев тобының құрамында жаппай тәртіпсіздіктерге белсенді қатысқан деген күдікке ілінген. Қылмыс жасағаннан кейін күдікті елден қашып, осы уақытқа дейін бой тасалап келген. Оған халықаралық іздеу жарияланған. Жуықта ол Біріккен Араб Әмірліктері аумағында ұсталып, Қазақстанға жеткізілді. Қазір күдікті Астананың тергеу изоляторында отыр.
Оған тағылған қылмыстар бойынша жаза ретінде 10 жылдан 15 жылға дейін бас бостандығынан айыру және мүлкін тәркілеу жазасы көзделген, деп жазды Бас прокуратура.
