Алматыдағы «Бағанашыл» балалар үйінің тәрбиеленушілерін көшіруге қатысты жағдайға Президент араласты. Бұл туралы Мемлекет басшысының кеңесшісі – баспасөз хатшысы Руслан Желдібай , деп хабарлайды F16.kz.
«Бағанашыл» балалар үйінің тәрбиеленушілерін Алматыдан Қонаев қаласына көшіруге байланысты жағдаймен танысқан Қасым-Жомарт Тоқаев Алматы қаласының әкімі Дархан Сатыбалдыға оқушылардың оңтүстік астанада білім алуын жалғастыру үшін балалар үйіне жөндеу жұмыстарын жүргізуді және аталған нысанды қаланың балансына алуды тапсырды.
Мемлекет басшысының тапсырмасына сәйкес, балалар үйі көшірілмейді.
Аталған жағдайға байланысты Президент Әкімшілігі қызметтік тексеріс жүргізеді.
Ата-анасының қамқорлығынсыз қалған балалардың заң шеңберіндегі барлық құқығы толық сақталады. – деп жазды Руслан Желдібай телеграм арнасындағы ресми парақшасында.
Естеріңізге сала кетейік, биыл көктемде Алматыдағы «Бағанашыл» балалар үйі апатты жағдайда деп танылған. Сол себепті аталған мекеменің тәрбиеленушілерін Қонаев қаласындағы жаңа ғимаратқа көшіру жоспарланған. Бірақ ата-ана қамқорлығынсыз қалған балалар бұған қарсылық білдірді.
Бүгін 21 шілдеде Алматының Бағанашыл ықшамауданында орналасқан №1 балалар үйінде тәртіп сақшылары мен тәрбиеленушілер арасында жанжал болды. Полиция қызметкерлері таңертең балаларды Қонаев қаласындағы жаңа балалар үйіне көшіру үшін келген. Алайда тәрбиеленушілер көшуге қарсы болып, полицияға қарсы шықты.
