Шығыстың бас қаласында дәстүрлі ауыл шаруашылығы жәрмеңкесі өткізіледі, деп хабарлайды F16.kz.
Кезекті жәрмеңке 14 ақпанда болады. Сауда алаңы таңғы сағат 08.00-де ашылып, 14.00-ге дейін жұмыс істейді. Іс-шара «Алтай» көтерме-тарату орталығының аумағында (Жібек жолы көшесі, 44) өтеді.
Жәрмеңкеге өңірдің жергілікті тауар өндірушілері мен кәсіпкерлері қатысып, тұрғындарға сапалы ауыл шаруашылығы өнімдерін ұсынады. Сатылымда сиыр, жылқы, қой, құс еті және сүт өнімдері, құрт-ірімшік, сары май, шұжықтардың түр-түрі болады.
Ұйымдастырушылардың айтуынша, мұндай жәрмеңке тұрғындарды бағасы нарықтағыдан арзан әрі табиғи өнімдермен қамтамасыз етуге, ал жергілікті өндірушілерге тауарын тікелей халыққа ұсынуға мүмкіндік береді. Қала тұрғындары мен қонақтары сенбі күні таңертең жәрмеңкеге келіп, сапалы азық-түлік өнімдерін тиімді бағамен сатып ала алады.
