Серікбаев көшесі 1/3 мекен жайында орналасқан балалар жұқпалы аурулар бөлімшесі жаңа ғимаратқа көшіріледі. Бұл туралы ШҚО әкімінің бірінші орынбасары Жақсылық Омар айтты, деп хабарлайды F16.kz.
Келер жылдан бастап жұқпалы аурулар бөлімшесі қазір перзентхана орналасқан Өтепов көшесіндегі төрт қабатты кең әрі заманауи ғимаратта жұмыс істейді.
Тұрғындар балалар инфекциялық бөлімшесіне жиі шағымданғандықтан мекемеге барып, жағдаймен жіті таныстық. Жаңа жобалық-сметалық құжаттаманы әзірлеу жұмыстары жуықта басталады. Жөндеу жұмыстары барысында барлық санитарлық және эпидемиологиялық талаптар қатаң сақталады, — деді Жақсылық Омар.
Айта кету керек, Серікбаев көшесінде орналасқан ғимарат ескі және талаптарға сай келмейді. Тұрғындар кейде орын жетіспей қалатынын, палаталардың тарлығын айтып жиі шағымданады
Ақ халаттыларға да, бүлдіршіндерге де жайлы, қауіпсіз жағдай жасау керек. Жаңа ғимаратқа көшкеннен кейін Ана мен бала орталығының барлық бөлімдері бір жерге шоғырланады. Ол ата-аналарға да, балаларға да ыңғайлы. Орын саны артып, сапалы медициналық көмек алуға мүмкіндік болады, — деді облыс әкімінің бірінші орынбасары.
Естеріңізге сала кетейік, бұған дейін перзентхана да жаңа ғимаратқа көшірілетінін хабарлағанбыз.
