Шығыс Қазақстан облысында жазғы демалыс маусыма дайындық жұмыстары қарқынды түрде жүргізіліп жатыр. Самар ауданындағы Новостройка ауылында «Балауса-2» спорттық-сауықтыру лагерін ауқымды жаңғырту жұмыстары жалғасуда , деп хабарлайды F16.kz.
Құрылыс және жөндеу жұмыстары аяқталғаннан кейін лагерь бір маусымда 160 балаға дейін қабылдай алады.
Самар ауданының әкімі Серік Жеңісов Шығыс Қазақстан облыстық білім басқармасының басшысы Қуат Оқасовпен бірге нысанға барып, құрылыс және жөндеу жұмыстарының барысымен танысты. Жұмыс сапары барысында олар лагерь аумағын, жаңа корпустарды аралап көріп, мердігер ұйыммен жобаны іске асыру мерзімі мен жұмыс сапасын талқылады.
Қазіргі уақытта «Балауса-2» аумағында 120 орынға арналған үш жаңа корпус салыны жатыр. Сондай-ақ лагерьдің қолданыстағы екі қабатты ғимаратына ағымдағы жөндеу жұмыстары жүргізілуде. Бұған дейін лагерь небәрі 40 балаға есептелсе, кейін оның сыйымдылығы 60 орынға дейін ұлғайтылған болатын. Жаңғырту аяқталған соң лагерь мүмкіндігі шамамен төрт есеге артады, — дейді аудан әкімдігінің баспасөз қызметі.
Қазіргі уақытта мердігер ұйым жөндеу жұмыстарына кірісіп кеткен. Сонымен қатар жазғы демалыс кезінде балаларға қолайлы жағдай жасау үшін лагерь аумағында сегіз көлеңкелі шатыр орнату жоспарланған.
Сапар барысында Серік Жеңісов лагерь аумағына септик және трансформатор орнату мәселесін пысықтап, аумаққа толықтай қоршау орнату және электр қуатын күшейту мәселесін шешуді тапсырды. Қауіпсіздік пен санитарлық талаптарды сақтау мәселелеріне де ерекше назар аударылды. Мамандарға лагерьдің кеңеюін ескере отырып, медициналық оқшаулау бөлмесіне қойылатын талаптарды зерделеу және қажетті төсек-орын санын анықтау тапсырылды, — деп атап өтті Самар ауданы әкімдігінің баспасөз қызметі.
