Семейлік Ержан Амарханов ерекше балаларды атқа мінгізіп, жағалауда серуендетуді әдетке айналдырған және ол бұл қызметі үшін бір тиын ақы алмайды, деп хабарлайды F16.kz.
Ата-аналардың айтуынша, тұлпар тақымдаған балақайлар табиғат аясындағы жарты сағаттық курстан кейін әжептәуір жеңілдеп, көңіл-күйі көтеріліп қалады. Жылқыға жақындау олардың эмоциялық жағдайын жақсартып, оң энергия береді. Бұл жерге көбінесе ДЦП, аутизм, Даун синдромы және басқа да ерекшеліктері бар балалар келеді. Уақыт өткен сайын келушілер қатары арта түскен.
Ержан Амарханов алғашқыда бір атпен бастағанын айтады. Бірнеше айдан кейін достарымен бірге ерекше балаларға арналған атқора салған.
Мұның бәрі – тегін, «алғыс үшін ғана» жасалған іс, – дейді ол arnapress.kz сайтына берген жауабында.
Қазір олардың иелігінде сегіз жылқы мен екі пони бар. Сауықтыру шарасы 30 минутқа созылады, толық курс – 10 күн. Ем-дом шаралары дәрігердің нұсқаулығымен, сертификаты бар жаттықтырушылардың көмегімен өтеді. Әзірге иппотерапия клубының негізін қалаушылар қылқұйрықтарды өз қаражатына бағып отыр. Алдағы уақытта жоба авторлары бұл әлеуметтік бастаманы жергілікті билікке таныстырып, жыл бойы жұмыс істеуді жоспарлап отыр.
