Бүгін Риддер қаласында ауқымды тазалық акциясы өтті. Оған 1300-ден астам тұрғын қатысты. Нәтижесінде 5 тоннадан астам қоқыс жиналып, қала аумағы тазартылды, деп хабарлайды F16.kz.
Сенбілік кезінде ерекше сәт болды. Қаланың қарт тұрғыны сенбілікке қатысушыларға бауырсақ таратып, өз ризашылығын білдірді. «Қаланы дамытуға осылай үлес қостым» деген қарияның ықыласы еріктілердің көңілін көтеріп, жүректерге жылылық сыйлады. Бұл оқиға қала тұрғындарының ауызбіршілігі мен өзара қолдауын тағы бір мәрте көрсетті.
Сенбілікке жастар да белсенді атсалысты. Олар «Таза Қазақстан» бастамасын қолдау мақсатында флешмоб ұйымдастырып, шараның көңілді әрі мазмұнды өтуіне үлес қосты.
Сонымен қатар жергілікті футболшылар да сенбіліктен табылды. Олар алдымен спорт алаңын ретке келтіріп, кейін өзара жолдастық матч өткізді.
Жалпы, бүгінгі сенбілік Риддерде тазалық мәдениетімен қатар, бірлік пен өзара қолдаудың маңызын айқын аңғартты.
