Биыл Глубокое ауданында «Жайлы мектеп» ұлттық жобасы аясында екі білім ордасы бойы көтерді. Бүлдіршіндер жаңа оқу жылын жаңа мектепте бастамақ, деп хабарлайды F16.kz.
Белоусовка кентінде салынған «Жайлы мектептің» құрылысы аяқталып, 1 сәуірден бастап бастауыш сыныптар үшін қолданысқа берілген.
Бұған дейін кенттегі мектептерде орын тапшылығы өте өзекті мәселе болатын. Жаңа мектеп 300 орынға арналған. Екі ауысымда жұмыс істеуді жоспарлап отырмыз. Осы арқылы басқа мектептердегі жүктеме азаяды. Биыл мектеп сәуір айында қолданысқа беріліп, 1-4 сыныпта оқитын 50 бала биылғы оқу жылын аяқтады. Қыркүйектен бастап толыққанды жұмыс істейді, — дейді Глубокое аудандық білім бөлімінің бас маманы Айымгүл Смағұлова.
Айта кетейік, мектеп аралас типті, қазақ және орыс тілдерінде білім береді. «Жайлы мектептің» ашылуына ата-аналарда дән риза.
Ұлым 4-ші тоқсанды осы мектептен оқыды. Қуанышымызда шек жоқ. Мұнда балалардың білім алуына барлық жағдай жасалған, жайлы жиһаздар, кең кабениеттер, заманауи технологиялармен толық қамтылған, — дейді кент тұрғыны Құралай Боқаева.
Жаңа оқу жылында мектепте 22 сынып-комплект, оқушылардың техникалық, шығармашылық және танымдық қабілеттерін дамытуға бағытталған қосымша үйірмелер ашу жоспарланған.
